Mohamed El-Attar's Reviews > السكرية

Rate this book

Clear rating

1 of 5 stars 2 of 5 stars 3 of 5 stars 4 of 5 stars 5 of 5 stars

السكرية
by

Naguib Mahfouz,

نجيب محفوظ

Mohamed El-Attar's review

Aug 17, 2012

it was amazing

bookshelves: in-my-library, novels, مولانا_نجيب_محفوظ, favorites

.

نفسي أكتب ريفيو طويل عن الثلاثية على بعضها
لكن لقيت ان الثلاثية تحتاج لدراسة كاملة ممكن تتعمل كتاب
مش مجرد ريفيو على الجود ريدز نحكي فيه عن انطباعتنا الشخصية كقراء للرواية
او نظرتنا لمفهومها ومضمونها من حيث القيمة الأدبية كعمل درامي تاريخي ينتمي للأدب الكلاسيكي الواقعي
ولقيت وانا بفكر في الدراسة اني ممكن ألخصها فى شوية عناصر
كل عنصر كفيل بأنه يكون فصل كامل في الدراسة لوحده
ولو حبيت اتكم عن الثلاثية هنا فى الريفيو فأنا هتكلم عن العناصر:

1- شخصيات الرواية وتكوينها الأدبي:
ازاي قدر نجيب محفوظ يرسم شخصيات الرواية عن طريق وصفهم المميز جدا
سواء كان جسدي او نفسي وفكري، وازاي قدر يعبر عن الشخصية دي بشكل جذاب ومعبر فى الحوار نفسه
فهتلاقي ان قفشات السيد أحمد عبد الجواد متشابهه طول احداث التلات روايات
واللى بتوصف خفة دمه، وقوة شخصيته، ومدى هيبته وعظمته
وهتلاقي الهزل فى الحوار والسخرية من النفس والاستهزاء بكل القيم والمبادئ
في الشخصية الحيوانية اللى بتمشي ورا غريزتها وهي شخصية ياسين
وهتلاقي شخصية التيه والحيره الفكرية اللى بتتميز بالشك والأسئلة الكتيرة
وفى الغالب بتعتمد اكتر فى محاورة النفس اللى صاحبت الشخصية طول التلات اجزاء في شخصية كمال
خصوصا من بداية الجزء الثاني قصر الشوق
وهتلاقي الشخصية المستكينة السلبية او المقموعة بقوة فرض سيطرة الزوج احمد عبد الجواد
في شخصية أمينة اللى مذكرتش مرة طول الرواية سيرة زوجها إلا وقالت عليه سيدي
وكان كل كلامها رحيم وهادئ ومطمئن بإيمانها الشديد بالله وبالدين
وكل كلامها بينم عن الجهل وفطرة الإنسان النقية اللى مشوهتهاش الحياة
نتيجة انها مقفول عليها طول حياتها جوه بيتها
وعلى العكس تماما شخصية خديجة الابنة قبيحة الشكل خفيفة الدم طويلة اللسان
واللى بتسخر من كل شئ حواليها
لحد ما توصل للجيل الثالث فى الرواية وهو جيل الأحفاد
اللى بيتسم بالثورية وتحديد الأهداف بمعنى هو عارف كويس هو عاوز ايه
ومبلور أفكاره بشكل كويس وعشان كده في حواره تلاقيه ثائر وحاد
وده متمثل اكتر فى شخصيات احمد وعبد المنعم ورضوان وسوسن حماد
وبعد كل ده تدخل فى الترميز السياسي للشخصيات وده يدخلنا على العنصر التاني

2- شخصيات الرواية والرمز السياسي والتاريخي:
الثلاثية كل جزء فيها بيتكلم عن جيل معين له ابطاله في حقبة محددة من الزمان
وكل جيل بيرمز بيه نجيب محفوظ بشخصية قوية خلقها جوه الرواية
وفيه شخصيات مستمرة على الهامش فى التلات اجزاء ممكن نتكلم عليها بشكل مستفيض
زي شخصية الشيخ متولى عبد الصمد مثلا، او شخصية زنوبة العوادة، أو شخصية مريم
أو شخصية سوسن حماد، او شخصية عايدة شداد، او شخصية بدور شداد
لكن لو رجعنا للشخصيات الرئيسية فهنلاقي ان كل شخصية بتمثل عصرها وترمزله
في عصر الجهل والقوة الغاشمة والغريزة الحيوانية اللى بينشأ عليها فطرة الإسلام وإيمانه بمعتقدات دينيه
رغم تنقادته العجيبة بين إيمانه وتصرفاته، هنلاقي شخصية احمد عبد الجواد القوي داخل بيته، المؤمن التقي الخاشع فى صلاته
السكير والعربيد وصاحب جو الأنس والفرف��ة مع اصدقائه ومع عالم الرقاصات والعوالم
وفى العصر الثاني عصر التيه السياسي والفكري، عصر الانغلاق والشك والأسئلة
عصر الصراع بين الوفد والملك، والسعديين والعدليين حلفاء سعد زغلول وعدلي يكن
عصر التخبط والصراعات الداخلية المتفككة اللى بتؤدي إلى تشتت الأمة
هنلاقي اكبر ��ثال معبر ليها هو شخصية كمال
وفي العصر الاخير عصر الثورة والأفكار الثورية
سواء الدينية او الشيوعية الاشتراكية
واللى بتجمع الاتنين فى محاربة الظلم والفساد وانتشار العدالة الاجتماعية
وبتطمح كل واحدة فيهم بالاستيلاء على الحكم او الوصول اليه عن طريق المواجهة الفكرية او العنف المسلح
هنلاقيها في شخصيات عبد المنعم واحمد ابراهيم شوكت
حتى فى الجيل ده رمز للفساد والوصولية بالشذوذ اللي في شخصية محمد باشا عيسى صديق رضوان اللى استغله لامتاع شهوته، وسهله كل سبل النجاح ليه ولأسرته
وده رمز وان جاء على استحياء ولم يذكر بقوة فى الرواية ولكن كان رمز جرئ من مولانا لوصف فساد العصر ده

3- طريقة السرد الأدبي فى الاجزاء الثلاثة:
اعتمد نجيب محفوظ فى الجزء الأول على الوصف الكثير للأحياء والشخصيات والأماكن
والوصف القوي فى تعبيراته ولغته عشان ينم عن الحالة الزمنية الجامدة إلي حد ما فى العصر ده
واللى معتمدش فيها كتير نجيب محفوظ على الحوار اكتر من الوصف
وفي الجزء الثاني كان الوصف الذاتي او الحوار الداخلي للشخصيات هو المسيطر وخصوصا مع شخصية كمال
واللى بيعبر عن زمن التخبط والانغلاق الذاتي فى البلد، وحالة التيه اللى كان فيها حزب الوفد بعد الثورة
وحالة الرومانسية الحالمة اللى كان بيعيشها كمال في حبه
هي حالة الشعب مع الوفد وثورة 19 وسعد زغلول
من حيث التأليه للثورة وللوفد ولسعد زغلول نفسه
بغض النظر عن هل فى مقدرة الشعب ده ان يواجه مشاكله ويحلها
من اول الفساد الداخلي لحد جلاء الانجليز عن مصر ولا لأ
وفى الجزء التالت كان الحوار هو سيد الرواية
والحوار صاحب الجمل القصيرة القوية
اللى كان بيعبر عن ثورية جيله وطريقة تفكيرهم فى مقدرتهم على تحديد اهدافهم
واشتعال الصراع الفكري والمذهبي بين طوائف واحزاب مختلفة داخل الدولة

4- التأريخ السياسي والإجتماعي الحقيقي لعصر ما قبل الثورة:
ورؤية واقعية ومليانة بالتفاصيل لكل الصراعات والاحداث اللي مرت بيها مصر من قبل ثورة 19
لحد انتهاء الحرب العالمية التانية .. وصف للمجتمع والظروف الاجتماعية والاقتصادية
والعادات والتقاليد والأخلاق وشكل الشخصيات من لبس وأكل وكلام وتصرفات ومشاعر
كل ده قدر نجيب محفوظ بإمكانية عظيمه على وصفه وضمه داخل عمل كبير زي الثلاثية
عشان تكون مرجع دراسي حقيقي للعصر ده، وشاهد على كل حاجة فيه
كأنه صورة حية داخل وجدان الأعمال الأدبية لعصر من ازهى عصور الليبرالية الفكرية
والديمقراطية السياسية فى مصر
وصورة كاملة للطبقة المتوسطة فى مصر وتتطورها من طبقة محكومة بالعادات والتقاليد واحترام الدين
لطبقة متحررة فكرياً ودينياً وأخلاقياً وثائرة على كل العادات والتقاليد المعروفة ليها

5- المشروع الأدبي لنجيب محفوظ فى تأريخ الطبقة المتوسطة لمصر:
وده لوحدها عايز كتاب تاني واقتباسات من اعماله اللى بتأرخ الطبقة دي
على مدار رحلته الأدبية العظيمة لفترة كبيرة من التاريخ المصري
اللى مليانة بالتحركات والانقلابات والتطورات الفكرية والسياسية والاجتماعية
خلت شكل الطبقة دي هي محور محفوظ الأساسي فى رواياته
وكأنه بيقول بيها ان الطبقة دي وجودها الحقيقي وثقافتها ووعيها
هو المؤثر لمدى حضارة الدولة ونموها، او انحدارها وتخلفها الحضاري والاخلاقي

حاولت اختصر فى الكلام مع اني بقيت برغي كتير مؤخراً
بس المتعة اللى انا عشتها فى الثلاثية
ممكن تخليني افكر جدياً فى اني اكتب دراسة شاملة عن الثلاثية
او عن مولانا نجيب محفوظ نفسه
في يوم ما

.