“مرة وأنا بتكلم مع صاحبي السلفي أستشهدت بمعز مسعود وأ. مصطفى حسني أنهم بيقدموا دعوة للتدين السليم وأن مفيش داعي للتشدد الزائد اللي عند الشيوخ السلفيين. ساعتها صاحبي السلفي قالي خلينا نأجل النقاش في الخلافات الفقهية لأنها محدودة جداً يمكن أقل من 0.01% من الشريعة وأغلبها مقبولة وواخدة أكبر من حجمها، لكن أنت نفسك راجع كلام معز مسعود ومصطفى حسني بتركيز وقارنه بحياتك وتصرفاتك، هل أنت فعلاً بتنفذ كلامهم؟ هل أنت بتنفذ ال99.99% اللي كل الشيوخ والدعاة متفقين عليها؟ مشكلتي ومشكلتك ومشكلة كل المسلمين مش دعاة وسطيين ودعاة متشددين، وإنما مشكلتنا أن إحنا نفسنا مبنّفذش كلام حد فيهم.

طبعاً رده دا كان مفاجئ جداً ليا، كنت متوقع أنه يدافع عن فكره وشيوخه ويدخل معايا في المناظرات اللي بحبها عن حكم المعازف واللحية وصلاة الجماعة وصفة الحجاب ومصافحة النساء وباقي المسائل المشهورة اللي أنا حافظ ردودها من النت وبحب أفتحها وأتكلم فيها بسبب وبدون سبب عشان أحس وأظهر للقدامي أني فاهم فقه كنوع من المراهقة الدينية، ولكنه كعادته كان عاقل جداً ومسمحليش أدخله في جدال عن مشكلة فرعية وإنما رجعني لمشكلتي الأساسية؛ أني أنا نفسي اللي مش كويس وبهرب من الحقيقة دي بأني أنسب فشلي في طاعة ربنا لناس تانية ملهومش سيطرة عليا، بغض النظر مين هما وبيقولوا إيه.”